Know1ng

Aminado akong mahina ako pagdating sa mga numero. Noon pa man, hindi ko talaga nahiligan ang mga numbers kaya naman nagtuon ako ng pansin sa pagsusulat. Pero para kay Nicolas Cage sa palabas na “Know1ng”, ang mga numero ang naging susi para malaman niya ang katotohanan sa kanyang kapaligiran.

Maganda ang kuwento ng “Know1ng”. Kung ikaw ang tipo ng tao na mahilig sa usapang agham at relihiyon, tiyak na kagigiliwan mo ito. Pero kung ikaw naman ay medyo matatakutin, tiyak na matutuwa ka din dito kasi may mga eksena siya na parang “Final Destination”.

Magaling ang pagkakaganap dito ni Nicolas Cage na tila ata sa bawat pelikula niya ay paiksi nang pakiski ang hairline (mga 2-5 na pelikula na lang at puwede na siyang Shaolin monk). Sa palabas na ito, siya’y isang guro sa kolehiyo na nagpapaliwanag ng mga tungkol sa act of randomness at pre-determined acts. Sa mga katagang ito pa lang ay malalaman mo nang titirahin ng palabas ang agham at pananampalataya.

Hindi ko na ikukuwento kung ano ang kinahantungan ng mga tao sa palabas pero tiyak na mapapaisip ka sa iyong hinaharap. Mapapa-ngiwi ka din sa ibang eksenang nagpapakita ng aksidente pero kailangan talaga itong isama para lalong mapaisip ang mga manonood.

Sa aking pagsasaliksik, nalaman ko na ang visual effects director ng palabas ay siya ring nanguna sa mga effects sa pelikulang “I, Robot” ni Will Smith. Kaya naman pala ganun kalupit ang mga graphics. Tila talaga naroon ka din sa eksena.

Kung wala kayong maisip na panoorin bago mag-Holy Week, subukan niyo ang “Know1ng” at tiyak na hindi kayo lugi sa bayad. Baka nga habang Semana Santa ay isip-isipin niyo pa ang aral na inyong matututunan sa palabas.

Deyey’s Approval: 85%

* May gusto ka bang ipa-rebyu? Magpadala lang ng email sa “taglish.rebyu @ gmail . com” *