Puerto Prinsesa Subterranean Underground River National Park

Kategorya: Lugar
Klase: Kuweba
Pangalan: Puerto Prinsesa Subterranean Undergound River National Park (Palawan)

(Pangatlo sa apat na blogs sa “Palawan” series) (1) (2) (4)

Ang haba ng pangalan di ba? Pero nararapat lang ito para sa isang lugar na may bansag na “longest subterranean underground river in the world”.

Ang Puerto Prinsesa Subterranean Undergound River National Park (UR for short) ay isa sa mga tanyag na tourist spots sa Palawan. Ito ay isang trip kung saan ang mga tao ay sasakay sa isang bangka at, kasama ang isang guide, ay papasok sa kuweba na may ilog na may haba na 8 km! Opo… walong kilometro ang haba! Kaya lang, 1.5 km lang ang pinapa-tour sa mga tao dahil kung 8 km nga naman eh kawawa naman yung mga guide na bukod sa nagsasalita eh nagsa-sagwan pa!

Pagpasok mo sa loob, samu’t-saring rock formations ang makikita mo. Nakaka-aliw tingnan dahil iba’t-ibang hugis ang nabubuo dahil sa haba ng panahon na kanilang itinagal dito. At sa tulong na rin ng imahinasyon, marami kang makikitang kahalintulad ng mga bato sa tunay na buhay.

May lugar sa kuweba na tinatawag nilang “Katedral”. Ito ay dahil napakalaki nito at may mga rock formations na naghuhugis “3 Kings”, “Nativity” at imahen ng Panginoon. Meron ding mga bato sa ibang lugar na hugis “giant mushroom” at kandila.

Sa loob ng kuweba ay marami ring makikitang mga paniki. Dahil umaga ang trip, lahat ng mga paniki rito ay natutulog at nakasabit sa dingding. Kapag lumingon ka sa taas, puro lang paniki ang makikita mo. Malamang ay mamamangha ka at maiiwang bukas ang bibig mo. Iyan ang paborito ng mga paniki… naghahanap kasi sila ng mga bibig na puwede nilang bagsakan ng jebs…

Dahil din sa nasa ilalim siya ng lupa, ang UR ay parang may natural aircon sa loob. Wala kang mararamdaman na init kahit na kulob ang lugar. Parang ang sarap nga maligo doon kung hindi lang talaga puro jebs ng paniki ang ilog…

Sulit na sulit talaga ang pagpunta sa UR. Kahit na napakalayo nito (dalawang oras siya mula sa Puerto Prinsesa), tiyak na mamangha ka at matutuwa sa paglakbay mo sa kuweba. Babalik ang iyong alaala nung nag-aaral ka pa ng Science nung Grade 5. Iisipin mo ang mga klase ng bato. Matatandaan mong mammals nga pala ang mga paniki.

At mapapagtanto mo din na huwag magbubukas ng bibig kapag may nakasabit na paniki at handang-handang jumebs sa kahit ano mang nasa ilalim niya!

Deyey’s Approval: 96%

* May gusto ka bang ipa-rebyu? Magpadala lang ng email sa taglish.rebyu @ gmail . com *